பகவான் ஸ்ரீ சத்யசாயி பாபாவின் மகிமைகள் வார்த்தைகளுக்குள் அடக்கமுடியாதவை! குறிப்பாக பாபாவின் முதன்மையான மகிமையாகிய அவரின் உபதேச மொழிகள், அன்பெனும் உன்னத மொழியை அடிப்படையாகக் கொண்ட போதிலும் பாபாவின் பிறந்த தேசத்து மொழியாகிய சுந்தரத் தெலுங்கில் வழங்கப்பட்டது! பாபா வழங்கிய அவரது தெய்வீகப் பேருரைகளையும், அவரால் நிகழ்ந்த மகிமை சம்பவங்களையும் தமிழ் உட்பட பலநூறு மொழிகளில் மொழிபெயர்த்து சேவையாற்றியுள்ளனர் மூத்த சாயி பக்தர்கள். அந்த வகையில், ஒரு நவீன முயற்சியாக... பாபாவின் மகிமைகளை, அருளுரைகளை, கொஞ்சும் தமிழில்... கவிதை நடையில்... வழங்கும் தொடர் இது! பாபா வழங்கிய தெய்வீக வழிகாட்டல்களின் சாரம் குன்றாமல், மகிமைகள் சுவாரஸ்யம் குலைவுறாமல்... தமிழமுதத் தேன் சேர்த்து அழகு நடையில் வழங்குகிறது இந்தத் தொடர்!
வழங்குபவர்: கவிஞர் குஞ்சிதபாதம், நங்கநல்லூர்.
சொல்லமுது 1 : பாபா பரிவுடன் போதிக்கும் மூன்று வகை சாதனா மார்க்கங்கள்
( மூலம்: Summer Shower / May 30, 1973 )
...............
மனமது செம்மையானால்
மந்திரம் ஜெபிக்க வேண்டாம் என்கிறார் திருமூலர்.
ஐம் புலக் கள்வர் அகத்தில்
புகும்போது அகத்தில் நீ
இல்லையோ அருணாசலா! என்கிறார் பகவான் ரமணர்.
நம் உள்ளத்தில் உதிக்கும்
எண்ணங்கள் நம்மைத் தாயாகவும் உயர்த்தலாம்
பேயாகவும் ஆட்டி வைக்கலாம்.
...............
நாம் அசைவற்ற
மனம் பெறுவது எப்படி?
பகவான் பாபா காட்டும் அற்புத வழிகள் என்ன?
...............
பாபா போதிக்கும் சாதனா மார்க்கங்கள்!
அலைபாயும் மனதடங்க, அன்பரசர் சாயீசர் மூவகை சாதனா மார்க்கங்களை கற்பிக்கிறார்.
அவை பின்வருமாறு:
........
-
மச்ய (மீன்) சாதனா
எப்படி ஒரு மீன் நீரில் மட்டும் ஜீவிக்க இயலுமோ,
அதுபோல இந்த வகை சாதனை,
தனிமையில் மட்டுமே செய்ய இயலும்.
குழுக்களாக இதை சேர்ந்து பயில இயலாது.
தனிமையே இனிமை என்பது தான் மச்ய சாதனையின் இயல்பு............
-
மிருக சாதனா
இவ்வகை சாதனைகள்
ஒரு குழுக்களாக இணைந்து செயல்படும் தன்மை கொண்டவை.
தனிமையில் இதை மேற்கொண்டால் கவனம் சிதறி,
சாதனைகள் கைகூடாத நிலை ஏற்படும்............
-
கூர்ம (ஆமை) சாதனா
எப்படி ஆமை தரையிலும் தண்ணீரிலும்
எவ்வித சிரமமும் இன்றி வாழ்கிறதோ,
அதுபோல இந்த சாதனையாளர்கள்,
சூழ்நிலையின் கட்டுப்பாட்டுக்கு அப்பாற்பட்டவர்கள்.
தனிமையோ கூட்டமோ, அவர்களின் சாதனை இடையூறின்றி தொடரும்.
ஆகவே சம நிலையில் மனதை வைத்திருந்தால்,
அது அசைவற்று நிலைத்து நிற்கும்.
......
ஜெய் சாய்ராம்!
சொல்லமுது 2 : போதையின் பாதையில் புதைந்தவர் மீண்டார்
(ஸ்ரீ சத்யசாயி பாபாவின் லீலா விபூதி பள்ளிக்கால சக-மாணவரை மீட்ட அற்புதம்)
திருநீறு என்னும் விபூதி, சிவ
மார்க்கத்தின் குறியீடாகவும்,
முடி சார்ந்த மன்னர்கள், ஒரு பிடி சாம்பல் ஆவர் என்ற நிலையாமை
தத்துவ விளக்கமாகவும் விளங்குகிறது.
பகவான் பாபாவின் பவித்ர லீலா
விபூதியின் மகிமை, சொல்லில் அடங்காத சுந்தர புராணம்.
அதில் ஒரு சிறு துளியை
இங்கு சுவைப்போமா
..........
இறைவனே நீங்கா நட்பு
..........
அது சத்ய நாராயணனின் பள்ளிப் பருவம். அவருடைய இஸ்லாமிய
நண்பர் மொய்னுதீன் பாபாவுக்கு நெருக்கம்.
நீ எனக்கு மிட்டாய் வரவழைத்து கொடுத்தால்தான் உன் தொப்பியைத் தருவேன் என
சத்யாவிடம் அடம் பிடிக்கும் நெருக்கம்.
காலச் சக்கரம்
சுழன்றது.
............
சத்யா, சத்ய சாயி பாபாவாக
பரிமளிக்க, மொய்னுதீன்
உறவ கொண்டாவில்
ஒரு பிரபல டாக்டராக உருவெடுத்தார்.
ஆறு புதல்விகளும் நான்கு புதல்வர்களும் உள்ள நிலையில்
அவர் மனைவியை இழந்தார்.
போதை வழிகாட்ட
பாதை தவறியது
..........
சந்தர்ப்பவசமாக, மார்பின்
என்கிற போதை அரக்கனிடம்
சிக்கி, மீள இயலாமல்
படுகுழியில் விழுந்தார்.
நாள் ஒன்றுக்கு 2 என்று ஆரம்பித்த போதை ஊசிப் பழக்கம்,
4/8/24 என கூடி, 3 மாதத்தில், தினசரி 30 போதை ஊசிகள் என்ற
மீளாத புதை குழியில் விழுந்து அமிழ ஆரம்பித்தார்.
இருந்த சொத்துக்கள் கரைந்தன.
பெற்ற பிள்ளைகள் பிச்சை எடுக்க ஆரம்பித்தனர்.
இவ்வாறு 9 துயரமான வருடங்கள்
உருண்டோடி அவரது மனமும் உடலும் சீரழிந்து விட்டன.
உள்ளத்தில் ஒளிக்கீற்று
..........
குரு அருள் திரு அருளாக
அவர் ஆழ்மனதில் ஓடியது போலும்.
அது ஒரு குரு வாரம்.
அருகில் உள்ள கோயிலில் சத்ய சாயி பஜன். சென்று பங்குபெற்றார்.
அவர் நினைவில் ஒரு எண்ணம் வளையமிட்டது!
பாபா.... உனக்கு என்னை நினைவிருக்கிறதா.
நான் வீழ்ந்திருக்கும் படுகுழி நீ அறிந்திருப்பாய் அல்லவா?!
நீ இறைவனா இல்லையா என்ற ஐயப்பாட்டினுள்
நான் செல்ல விரும்பவில்லை!
என் அனுபவத்திலிருந்தே அதை அறுதியிட விழைகிறேன்!
இந்த கொடிய பழக்கத்திலிருந்து மீள எனக்கு மன உறுதி கொடு!
அப்படி நான் மீண்டால் நீ இறைவன் என்பதில் ஐயமில்லை!
.........
பஜன் முடிந்தது. விபூதி பிரசாதம் கிடைத்தது!
அவர் மனதிலும்
ஓர் உறுதிமொழி பிறந்தது!
பாபா..... இனி வரும் 3 நாட்களில் எது நேரினும்
இந்த மார்பின் என்கிற போதையை நாட மாட்டேன் என சபதம் ஏற்றார்!
சபதத்தின் விளைவுகள்
மிக கோரமாக இருந்தன.
..........
முதல் நாள்...
அளவற்ற வியர்வை
மூட்டு வலிகள்
எரிச்சல் பய உணர்வு
இரண்டாம் நாள்...
சிறுநீர், மலம்
வழியே ரத்தப்போக்கு
தற்கொலை எண்ணம்
மூன்றாம் நாள்...
நிலைமை மிக
மோசமானது
தாள இயலாத
வலியால் துடித்து, சுவர்களில்
முட்டி மோத ஆரம்பித்தார்
இது தான் இறுதியோ என்ற எண்ணத்துடன்!
அவரது குழந்தைகள் பதைபதைத்து
அழ ஆரம்பித்தன!
நிலைமையின் தீவிரம் கண்டு சகிக்க இயலாமல்,
அவரது சக டாக்டர், 4 போதை ஊசிகளை கொடுத்து...
போட்டுக்கொள் என்றார்!
மறுத்துவிட்டார் மொய்னுதீன்!!
பாபாவின் ஆணையிட்ட என்
சத்தியத்தை ஒரு போதும்
நழுவ விடேன் என்றார்.
..........
இந்த மனம் கரையும் நிகழ்வுகளை கடந்த பின்,
காலை 3.45 மணிக்கு, அவர் தனது மகள் ஹபீசாவிடம் பாபா
விபூதி எடுத்து வரச் சொல்லி,
சிறிது வாயில் இட்டு தண்ணீரும் அருந்தினார்.
இறைவன் பாபாவின் கண்ணுக்குத்
தெரியாத பனிக்கரங்கள் தாலாட்டியது போலும்.
அவர் ஆழ்ந்து உறங்க ஆரம்பித்து
காலை 11 மணிக்கு தான் கண் விழித்தார்.
அப்போது போதை மருந்து ஊசிகளுடன் வந்த
அவரது டாக்டர் நண்பரிடம் கூறினார்.
ஸ்வாமியின் அருளால்
என் மனம் தெளிவாகவும்
அமைதியாகவும் இருக்கிறது.
இனி எனக்கு இந்த போதை ஊசிகள்
வேண்டாம்!
.......
அற்புதமே பாபாவின் அன்றாட வாடிக்கை.
முழு நம்பிக்கையுடன் மனம் உருகி சாயிராம் என்று ஜெபித்து
திருநீறு அணிந்தால்
வரும் நூறு வினைகளும்
அழிந்தொழியும். வாழ்வும்
செழிக்கும்!
ஜெய் சாய்ராம்!
சொல்லமுது 3 : இங்கும் அங்கும் எனக்கும் பாபா!
(ஜிம்பாப்வேயில் எளிய தொழிலாளர் மத்தியில் தோன்றிய பாபா)
வானினும் விரிந்தது.
ஆழியினும் ஆழமானது
பகவான் பாபாவின் அற்புத அருள் வீச்சு!
பேரண்டம் பரவிடும் அவரது லீலா
விநோதங்கள் பற்பல!
ஆப்பிரிக்க கண்டத்திலும்
அவர் நிகழ்த்திய ஒரு அற்புதம்
தனைக் காண்போமா
..........
ஸ்வாமியின் பிருந்தாவனக்
கல்லூரியில் பணி ஆற்றிய
Dr. நித்யானந்த மேனன் விவரிக்கும்
இந்த அற்புத நிகழ்வை படித்து,
மனதில் படமாக பதித்து ரசிக்கலாம் வாருங்கள்!
..........
ஜிம்பாப்வே
..........
ஆப்ரிக்க கண்டத்தின் தென் பகுதியில் உள்ள ஜிம்பாப்வேயில்
பல அரசியல் குழப்பங்கள்
நிகழ்ந்து கொண்டிருந்த
சமயம் அது!
அங்கு வசித்து வந்த ஒரு தொழிலதிபர்
அச்சமயம் பம்பாய் நகரில் சில காலம் தங்கி இருந்தார்.
அப்போது அவருடன் தொடர்பில் இருந்த
பாபாவின் மேல் நாட்டு பக்தர்கள் மூலமாக
பாபா பற்றி கேள்விப்பட்டார்.
..........
அன்பின் பிடி இறுகியதோ
...........
பாபாவின் அற்புதங்கள்
பற்றி அவர் செவிமடுத்த
செய்திகள் அவரை வியப்பில் ஆழ்த்தின.
அச்சமயம் பம்பாய் தர்ம க்ஷேத்திரத்தில் தங்கி
இருந்த பாபாவின் தரிசனமும் பெற்றார். கருணை கவர்ந்திழுக்க
புட்டபர்த்தி சென்றார். சில
மாதங்கள் அங்கு தங்கினார்.
புட்டபர்த்தியில் அவருக்கு பகவானின் நேர் காணல்
பாக்கியம் கிடைத்தது.
தூய வாழ்வு வாழ்!
உனக்காக உழைப்பவர்களிடம் அன்பைப் பகிர்!
என்று கூறி பகவான் அவரை ஆசீர்வதித்தார்.
...........
இதற்கிடையில் ஜிம்பாப்வேயில், ஒரு புரட்சி மூலமாக அரசாங்கம்
கைப்பற்றப்பட்டது பற்றி செய்தி அறிந்த அவர்
தமது பண்ணை மற்றும் சொத்துக்கள் பாதுகாப்பு பற்றி
மன உளைச்சல் கொண்டார்.
ஆனால் சொத்துக்கள் பத்திரமாக இருப்பதாகவும்,
தொழிலாளர்கள் விசுவாசத்துடன் பணி ஆற்றுவதாகவும்,
அவரது மேனேஜர் மூலம் வந்த செய்தி கேட்டு,
மன அமைதி அடைந்தார்!
..........
அன்பைச் சுமந்து நாடு திரும்பினார்
.........
பிரிய மனமின்றி பிரசாந்தியை விட்டு,
அவர் தமது நாட்டுக்கு திரும்பினார்.
அன்றிரவே அவர் தமது தொழிலாளர்களின்
ஒரு கூட்டத்திற்கு ஏற்பாடு செய்தார்.
தமது இந்தியப் பயணம் பற்றியும்
அங்கு தான் தரிசித்த இறைவனாம் பாபாவைப் பற்றியும்
நெகிழ்ச்சியுடன் கூறினார்.
பிறகு அனைவரின் நலம் கேட்டு அறிந்து,
அவர்களுடன் விருந்து உண்டு மகிழ்ந்தார்.
..........
இதோ இவர்தான் பாபா!
..........
பிறகு, கூட்ட அரங்கில் மேடையில் வைக்கப்பட்டு,
திரைச்சீலை போட்டு மூடப்பட்டிருந்த
பாபாவின் திரு உருவப் படத்தின் மேல் இருந்த சீலையை அகற்றி...
தரிசியுங்கள்…. இவர் தான் இறைவன் பாபா என்றார்!
பார்த்த தொழிலாளர்கள், வியப்பை வெளிக்காட்டவில்லை.
ஆனால் இவரா? இவரை எங்களுக்கு முன்னமே தெரியும் என்றனர்!
வியந்த தொழிலதிபர் முன்பு
விரிந்தது ஒரு அற்புத வரலாறு!!
..........
தொழிற் சங்கத் தலைவர் இது பற்றிக் கூறும் போது …
இவரை நாங்கள் நன்கு அறிவோம்!
முதன் முதலாக தொடுவானத்தில்
ஒரு கதிர் ஒளியாக இவரைக் கண்டோம்.
பிறகு எங்களுக்கு அருகில் வந்து அமர்ந்தார்!
எங்களுடன் அளவளாவினார்!
நமக்கு உப்பிட்டவரிடம் விசுவாசம்
காட்டவேண்டும் என்று கூறியவர்
அனைவரிடமும் அன்பைப்
பகிர வேண்டும் என்றும் உபதேசித்தார்!
நீங்கள் பர்த்தியில் தரிசித்த அதே சமயத்தில் எங்களுடனும்
இருந்து நல்வழி காட்டி
இருக்கிறார் என்றார் ~ வியப்புடன் அந்தத் தொழிலாளர் தலைவர்!
பகவானின் கருணையும்
வியாபகத் தன்மையும்
கண்டு, அந்த தொழிலதிபர் கண்கள் பனித்தன.
கரங்கள் ‘சாயிராம்’ எனக் குவிந்தன!
யாராலும் நிகழ்த்த இயலாத செயல்,
பிறரது மன மாற்றம் தான்!
ஆனால் இறைவன் பாபாவுக்கோ
அது ஒரு நொடி நேர மாயாஜாலம்!
..........
பாபாவின் பரந்த கருணையும்
விரிந்த அருளும் நம் அனைவரின் மீது படர்ந்து
ஆசீர்வதிக்கட்டும்!
ஜெய் சாய்ராம்!
சொல்லமுது 4 : பனி பொழியும் காஷ்மீரிலில் இனிதான பாபாவின் லீலா விநோதங்கள்!
(கண்ணுக்கு இனிமையான பூந்தோட்டங்கள் மனதிற்கு இதமான பனிப் பொழிவுகள், நகரும் படகு வீடுகள் கொண்ட கவின்மிகு காஷ்மீர், பகவான் பாபாவின் திருவடித் தடங்கள் இருமுறை சுமக்கும் பாக்கியம் பெற்று புனிதமடைந்தது)
பகவான் ஸ்ரீ சத்ய சாயி பாபா 1957 மற்றும் 1980 ஆகிய ஆண்டுகளில் இரண்டு முறை காஷ்மீர் பள்ளத்தாக்கிற்குப் பயணம் மேற்கொண்டார். இந்த இரு பயணங்களும் மனம் நெகிழும் அருளும், உலகம் வியக்கும் அற்புதங்களும் நிறைந்தவை.
.........
முதல் காஷ்மீர் பயணம்
.........
1. 1957ம் ஆண்டு ஆகஸ்ட் மாதத்தில் தமது முதல் காஷ்மீர் பயணம் மேற்கொண்ட பாபா, அங்கு நான்கு நாட்கள் தங்கினார். ஸ்ரீநகரில் உள்ள தால் ஏரியில் 'அலெக்சாண்ட்ரா பேலஸ்' (Alexandra Palace) என்னும் படகு இல்லத்தில் பாபா தங்கியிருந்தார். அங்கு 14,000 அடி உயரமுள்ள கிலன்மார்க் மலைப்பகுதிக்குச் சென்ற அவர், அங்குள்ள பனியில் தமது வெறுங்காலுடன் நடந்து மகிழ்ந்தார். உள்ளூர் பக்தர்களின் இல்லங்களுக்குச் சென்ற பாபா, அவர்களுக்கு ஆசி வழங்கினார்
.........
இரண்டாவது காஷ்மீர் பயணம்
.........
அடுத்த காஷ்மீர் பயணமாக ஸ்வாமி 1980 ம் ஆண்டு பக்தர்கள் மற்றும் மாணவர்கள் கொண்ட 18 பேர் குழுவுடன் 11 நாட்கள் தங்கி இருந்தார்.
அப்போது உதம்பூர் மற்றும் பஹல்காமில் உள்ள இந்திய ராணுவ முகாம்களுக்கு நேரில் சென்று வீரர்களின் தன்னலமற்ற சேவையைப் பாராட்டி ஆசி வழங்கினார்.
அப்போதைய ஜம்மு-காஷ்மீர் முதலமைச்சர் ஷேக் அப்துல்லா, ஆளுநர் எல்.கே. ஜா மற்றும் சஞ்சய் காந்தி ஆகியோர் பாபாவைச் சந்தித்து ஆசி பெற்றனர். அதன் பின்னர் ஸ்ரீநகரில் நடந்த பிரம்மாண்ட பொதுக்கூட்டத்திலும் பாபா உரையாற்றினார்.
பகவான் பாபாவின் பயணம் வெறும் மன மகிழ்ச்சிப் பயணமல்ல. அது ஆன்மீக அற்புத ஒளித் தீபங்களை அனைவரின் மனங்களிலும் ஏற்றி வைக்கும் புனிதம்.
இந்தப் பயணத்தின் போது தச்சிகாம் பகுதியில் அமர்நாத் பனிலிங்கம் போன்ற படிக லிங்கத்தையும், பத்ரிநாத் லட்சுமி நாராயணர்உருவத்தையும். பஹல்காமில் ஆதிசங்கரர் வழிபட்ட சிதம்பர லிங்கம் மற்றும் ஸ்ரீ சக்கரம் ஆகியவற்றையும் வரவழைத்து பக்தர்களை ஆனந்தத்தில் ஆழ்த்தினார்.
.........
பகவான் பாபா தாம் நிகழ்த்தும் அற்புதங்களை,தமது விசிட்டிங் கார்ட் என்று கூறுகிறார். மனிதர்கள் மனதில் நம்பிக்கையை விதைக்கவும், அவர்களை நல்வழிப் படுத்தவும், "வசுதேவ குடும்பகம்" என்ற"ஓர் உலகத்" தத்துவத்தை நிலை நிறுத்தவும் உபதேசங்கள், லீலைகள் மூலமாகவும், தமது வாழ்வின் மூலமாகவும் நம்மை வழி நடத்துகிறார்.
ஜெய் சாய்ராம்!

கருத்துகள் இல்லை:
கருத்துரையிடுக